ለምን ጣሊያናውያን ላይ ...

  |   Written by   ረድኤት የኔነህ   |   ሕብረተሰብ / social


የሰውን ልጅ አንደ ቅጠል እያረገፈ ያለው የኮሮና ቫይረስ አሁንም ተባብሶ ቀጥሏል።የስርጭቱንም አድማስ አስፍቶ አለምን ከዳር ዳር እያጥለቀለቃት ነው።ቫይረሱ ያኔ ቻይናን እንዲያ ሲያተረማምስ በዚህ ፍጥነት አለምን ያዳርሳል ተብሎ አልተገመተም ነበር።ከሁሉም ሀገራት ግን በከፋ ደረጃ ቫይረሱ ጣሊያናውያኑ ላይ ጡንቻውን እያሳየ ይገኛል።ትላንት እንደተሰማው መረጃም ኮሮና በአንድ ጀምበር 645 ሰዎችን ወደ መቃብር ሸኝቷል።ይህም ከእስካሁኑ ሁሉ አስደንጋጭ ቁጥር ሆኖ ተመዝግቧል።

ጣሊኖች ለምን በዚህን ያህል ደረጃ ለኮሮና ተጋላጭ ሆኑ?ለሚለው ጥያቄ ABC NEWS ተከታዮቹን መልሶች በዘገባው ይዞ ወጥቷል።

1.በቀዳሚነት የሚጠቀሰው ምክኒያት የህዝቡ የእድሜ ስርጭት መጠን ነው(age distribution of Italy's population)።በጣሊያን አብዛኛው ሰው አድሜው ከ65 አመት በላይ እንደሆነ መረጃዎች ያሳያሉ።ይህ በሽታ ደግሞ ጎልማሳነት እድሜ ላይ ያሉትን ሰዎች በስፋት እንደሚያጠቃ ሲነገር ነበረ ጉዳይ ነው።ከወደ ቻይና የተገኘ መረጃ እንደሚያመለክተውም ፣በቻይና በቫይረሱ ከሞቱት ሰዎች ውስጥ 80 በመቶ የሚሆኑት እድሜያቸው ከ60 በላይ የሆናቸው እንደነበሩ በመረጃው ተጠቅሷል።

2.ሌላኛው ምክንያት ደግሞ ሲጋራ ማጨስ ነው።እንደሚታወቀው ኮቪድ- 19 በዋናነት የአተነፋፈስ ችግር የሚፈጥር ቫይረስ ነው።ሲጋራ ደግሞ የሳንባን ተግባር አና የሰውነታችንን በሽታ የመከላከል አቅም የሚያዳክም ንጥረ ነገርን የያዘ ነው።ይህ ማለት የአተነፋፈስ ስርአታችን ላይ እክል ይፈጠራል ማለት ነው።እናም ሲጋራ የሚያጨስ ሰው በቫይረሱ ሲጠቃ የመቋቋም አቅም ስለማይኖረው ቫይረሱ ሰውየውን ወደ ሞት ያፋጥነዋል።በቅርቡ የወጡ መረጃዎች እንደሚያሳዩት ደግሞ 21በመቶ የሚሆነው ጣሊያናዊ አጫሽ እንደሆነ ይነግረናል።

3.ሶስተኛው ደግሞ የጣሊያኖች ልማድ ነው።CDC የተባለው ተቋም እንደገለፀው ለቫይረሱ ተጋላጭ ከሆኑት ነገሮች አንዱ ከሰዎች ጋር ስንገናኝ በእኛ አና በሌላኛው ሰው መሃል ያለው ጥግግት ነው።የጣሊያን ሰዎች ደግሞ ከወዳጆቻቸው አና ጓደኞቻቸው ጋር ሲገናኙ ተቃቅፈው ና ጉንጮቻቸውን ተሳስመው ነው ሰላምታ የሚለዋወጡት(በዚህች እንኳን እኛ ሳንብስ አንቀርም)።እነዚህ ንክኪዎች ደግሞ ቫይረሱ በፍጥነት እንዲዛመት ምቹ መደላድልን ይፈጥሩለታል።

4.የመጨረሻው ደግሞ ሰዎች የቫይረሱን ምልክቶች ገና ማየት እንደጀመሩ ወደ ምርመራ አለመሄድ ነው ተብሏል።

ከላይ ከተጠቀሱት ምክኒያቶች ውስጥ በተራ ቁጥር 2 እና 4 ያሉት ለኢትዮጵያውያን ትልቅ መልክት አላቸው።በሀገራችን ዘጠኝ የደረሰው የተጠቂዎች ቁጥር እንዳያሻቅብ አነዚህን ነገሮች ቆም ብለን ማየት አለብን።ህዝቡ አሁንም ድረስ መጨበጡን አላቆመም፣ታክሲዎቻችን መተንፈሻ አስኪጠፋ ድረስ ሰው ጠቅጥቀው መጫናቸውን አልተውም።ታድያ በዚህ ሁኔታ ትምህርት ተቋማትን በመዝጋት እና በረራ በማቆም ብቻ በሽታውን መከላከል የማይታሰብ ነው።"ሳይቃጠል በቅጠል ነወና" ሁላችንም ከጣሊያን ተምረን ራሳችንንም ሌላውንም ሰው ከቫይረሱ እንጠብቅ!ለመረጃው ABC NEWSን ተጠቅሜያለሁ።





ጤና ይስጥልኝ !!!